11.09c
Երեվան
հնգ, մյս 16
Գամիշլին կը համարուի Սուրիոյ ամէնէն ապահով շրջաններէն մէկը: Այս մասին «Արեւելք» իմացաւ Գամիշլիի իր աղբիւրէն: Մեր աղբիւրը նաեւ յայտնեց, թէ շրջանի ընդհանուր ապահովութիւնը ստանձնած է քրտական YPK-ն, որ PKK-ի սուրիական թեւը կը համարուի: Շրջանին մէջ կը գործեն երկու հայկական կեդրոններ եւ Ազգ. Եփրատ վարժարանի նախակրթարանն ու միջնակարգը: Միջնակարգի միացեալ («Մատրասէթ Իթթիհատըլ Խասսա») աշակերտութիւնը ընդհանրապէս հայեր են, կան նաեւ փոքր թիւով օտար աշակերտներ: Կեդրոններուն մէջ կը գործէ շտապ օգնութեան մարմին մը եւ, որեւէ խնդրի պարագային հայ բնակիչները կրնան կապ հաստատել եւ անհրաժեշտ օժանդակութիւնը ստանալ: Հայկական կեդրոնները ունին նաեւ դեղորայք բաժնելու դրութիւն եւ ըստ կարիքի դեղեր կը բաշխուին շրջանի հայ բնակիչներուն: Շրջանը ապրած է ջուրի սուր տագնապ եւ պատասխանատու մարմիններ անհրաժեշտ մեքենաներ (թրաքթոր, սիդէր) օգտագործելով ձրիաբար ջուր տրամադրած են ոչ միայն հայերուն, այլ տեղացի քրիստոնեայ ընտանիքներուն: «Արեւելք»ի Գամիշլիի մեր աղբիւրը նաեւ նշեց, թէ հայկական կեդրոններուն ընդհանուր ծախսերը կը հոգայ շրջանի Հ.Յ.Դ. «Վան» կոմիտէն, ինչպէս նաեւ՝ Առաջնորդարանն ու անհատ բարերարներ: Մեր աղբիւրին համաձայն շրջանին մէջ ապահովական ծանր միջադէպէր տեղի չեն ունեցած, իսկ գիշերները կը գործեն շրջող մեքենաներ հայկական թաղերուն անվտանգութիւնը պահպանելու համար: Կեդրոններուն շուրջ ապահովութիւնը ստանձնած 200 երիտասարդներուն տրուած են յատուկ անձնաթուղթեր , որպէսզի շրջանին մէջ գործող այլ ուժեր ճանչնան զիրենք: Մեր աղբիւրը նաեւ հաղորդեց, որ պահակ հայ տղոց բոլոր պէտքերը, ինչպիսին են ՝ հագուստ, առօրեայ սնունդ, եւ այլն, կը հոգայ նոյն մարմինը: «Արեւելք»ի Գամիշլիի աղբիւրը նաեւ հաղորդեց, թէ հայկական շրջանները կ'ապրին ամբողջական ինքնավարութեամբ մը եւ շրջանի քիւրտ պատասխանատուներուն հետ կայ համերաշխ եւ շինիչ համագործակցութիւն: «Արեւելք» յառաջիկայ օրերուն պիտի շարունակէ յաւելեալ տեղեկութիւններ փոխանցել Գամիշլիի հայկական թաղերու ընդհանուր իրավիճակին մասին:
